சபரிமலையில் தொடர்ந்து அதிகரித்து வரும் நெரிசல் காரணமாக குழந்தைகளும், முதியோர்களும் கடும் சிரமங்களை எதிர்கொண்டு வருகின்றனர். நீண்ட வரிசையில் காத்திருந்த ஒரு வயதான பெண் மாரடைப்பால் உயிரிழந்த துயர சம்பவமும் நடைபெற்றுள்ளது.
சபரிமலை ஐயப்பன் சன்னதியில் தினமும் 70,000 பக்தர்கள் ஆன்லைன் முன்பதிவின் மூலம், மேலும் 20,000 பேர் நேரடி (ஸ்பாட்) பதிவு மூலம் என மொத்தம் 90,000 பேர் வருகைக்கு அனுமதி அளிக்கப்படும் என தேவசம் போர்டு அறிவித்துள்ளது. ஆனால் நடைமுறையில் ஸ்பாட் பதிவு அடிப்படையில் கட்டுப்பாடின்றி அதிகமானோர் அனுமதிக்கப்படுவதால், பம்பை, மரக்கூடம் போன்ற பகுதிகளில் பெரும் நெரிசல் ஏற்பட்டு, பக்தர்கள் பல மணி நேரங்கள் இடத்தில் நிருத்தப்பட்டு பின்னர் அனுமதிக்கப்படுகிறார்கள்.
6 மணி நேரத்துக்கும் அதிகமாக காத்திருக்க வேண்டிய நிலை உருவாகி, அதற்கிடையில் குடிநீர் அல்லது கழிப்பிடம் போன்ற அடிப்படை வசதிகள் இல்லாததால் பக்தர்கள் கடும் அவதிப்படுகின்றனர். இதனுடன் கூட்ட திணிப்பால் பலருக்கும் மூச்சுத்திணறல் போன்ற சிக்கல்கள் ஏற்படுகின்றன.
இந்த சூழலில் அப்பாச்சிமேடு பகுதியில் ஏற்பட்ட கூட்ட நெரிசலில் சதி (58) என்ற மூதாட்டி உயிரிழந்தார். உடலை மீட்ட போலீஸார் விசாரணை நடத்தியதில், அவர் கோழിക്കோடு மாவட்டம் கோகிலாண்டி பகுதியைச் சேர்ந்தவர் என்பதும், மாரடைப்பால் மரணம் ஏற்பட்டதாக மருத்துவர்கள் உறுதிப்படுத்தினதும் தெரியவந்தது.
கட்டுக்கடங்காத வெகுஜன நுழைவால் குழந்தைகள், முதியோர் மிகுந்த சிரமத்தை சந்திப்பதால், பல பக்தர்கள் சபரிமலைக்கு செல்லாமல் பம்பா கணபதி கோயிலை வழிபட்டு திரும்பும் நிலையும் உருவாகியுள்ளது.
உப்பார்பட்டியைச் சேர்ந்த பக்தர் மணிகண்டன் கூறியதாவது:
“ஸ்பாட் புக்கிங்கை உடனடியாகக் குறைக்கவேண்டும் அல்லது முற்றிலும் நிறுத்தவேண்டும். இதுவே இத்தனை பிரச்சினைகளுக்கும் காரணமாக உள்ளது. லட்சக்கணக்கானோர் வரக்கூடிய அளவுக்கு இங்கு தேவையான வசதிகள் ஏற்பாடாகவில்லை. எந்த பெரிய விபத்தும் நிகழ்வதற்கு முன் கூட்டத்தை கட்டுப்படுத்த துரித நடவடிக்கை அவசியம்” என்றார்.
தேவசம் போர்டு தலைவர் ஜெயகுமார் தெரிவித்ததாவது:
“சபரிமலையில் பக்தர்கள் வருகை கணிசமாக உயர்ந்து வருகிறது. கூட்டத்தை கட்டுப்படுத்த போதுமான நடவடிக்கைகள் இல்லை. ஒரு நிமிடத்திற்கு மட்டும் 90 பேர் பதിനெட்டாம் படிகளை ஏற முடியும் நிலையில், தினமும் 90,000 பேரையே அனுமதிக்க வேண்டும். ஆனால் தற்போது இலட்சத்திற்கும் மேற்பட்டோர் கூடுகின்றனர். இதுபற்றி மாநில காவல் துறைக்கு கடிதம் அனுப்பியுள்ளேன். விரைவில் மத்திய பாதுகாப்புப் படை வருவார்கள் என நம்புகிறோம். பக்தர்கள் தரிசிக்கும் நேரமும் கூட்டநெரிசலை சமாளிக்க அதிகரிக்கப்பட்டுள்ளது” என்றார்.
கேரள காவல் துறையின் ஏடிஜிபி ஸ்ரீஜித் கூறியதாவது:
“செவ்வாய்க்கிழமை மதியம் 12 மணி வரை 1.96 லட்சம் பக்தர்கள் சுவாமி தரிசனம் செய்துள்ளனர். முன்னைய சீசனை விட இவ்வாண்டு மிக அதிகமான கூட்டம் திரளுகிறது. கூட்ட நெரிசலை கட்டுப்படுத்த தினசரி ஸ்பாட் பதிவு 20,000 ஆகக் குறைக்கப்பட்டுள்ளது. கூடுதல் போலீஸாரும் பணியில் ஈடுபடுத்தப்பட்டுள்ளனர். மத்திய பாதுகாப்புப் படை வீரர்கள் செவ்வாய்க்கிழமை இரவு வரக்கூடும். விதிமுறைகளை பக்தர்கள் பின்பற்றினால் நெரிசலை கட்டுப்படுத்த முடியும்” என்று தெரிவித்தார்.
