வரவிருக்கும் ஐபிஎல் 2026 சீசனுக்கான மினி ஏலம் டிசம்பர் 14 முதல் 17ஆம் தேதி வரை அபுதாபியில் நடைபெறும் என அதிகாரப்பூர்வமாக அறிவிக்கப்பட்டுள்ளது. இது, தொடர்ச்சியாக மூன்றாவது ஆண்டாக இந்தியாவுக்கு வெளியே நடைபெறும் ஐபிஎல் ஏலம் என்பதும் குறிப்பிடத்தக்கது.
ஐபிஎல் நிர்வாகத்தின் தகவல்படி, பத்து அணிகளும் டிசம்பர் 15ஆம் தேதிக்குள் தங்களது தக்கவைக்கப்பட்ட வீரர்களின் பட்டியலை வெளியிட வேண்டும். அதன் பின்னர், ஏலத்தில் பங்கேற்கும் வீரர்கள் — பேட்ஸ்மேன், ஆல்ரவுண்டர், பந்து வீச்சாளர் ஆகிய பிரிவுகளாகப் பட்டியலிடப்படுவர். அந்தப் பட்டியலை அடிப்படையாகக் கொண்டு, டிசம்பரில் நடைபெறும் மினி ஏலத்தில் அணிகள் தங்களுக்குத் தேவையான வீரர்களைத் தேர்வு செய்யவுள்ளன.
சிஎஸ்கே – ராஜஸ்தான் ராயல்ஸ் டிரேடிங் பரபரப்பு!
இதேவேளை, சென்னை சூப்பர் கிங்ஸ் (CSK) அணி மற்றும் ராஜஸ்தான் ராயல்ஸ் (RR) அணிகள் இடையே முக்கியமான டிரேடிங் ஒப்பந்தம் உருவாகி வருவதாக தகவல் வெளியாகியுள்ளது. அதன்படி, ரவீந்திர ஜடேஜா மற்றும் சஞ்சு சாம்சன் ஆகியோர் இடமாற்றம் செய்யப்படலாம் என கூறப்படுகிறது.
இருவரும் தங்களது அணிகளில் தலா ரூ.18 கோடி மதிப்பில் தக்கவைக்கப்பட்டவர்கள் என்பது குறிப்பிடத்தக்கது. மேலும், சஞ்சு சாம்சனை விடுவிக்க சிஎஸ்கே அணியில் இருந்து கூடுதல் வீரரை ராஜஸ்தான் ராயல்ஸ் கேட்டு இருப்பதாகவும் தகவல்கள் தெரிவிக்கின்றன.
விக்கெட் கீப்பர் பேட்ஸ்மேனான சஞ்சு சாம்சன், தொடக்க ஆட்டக்காரராக விளையாடும் திறன் கொண்டவர். அவர் சிஎஸ்கே அணியில் இணைந்தால், “தோனியின் பங்கு என்னவாகும்?” என்ற கேள்வி ரசிகர்கள் மத்தியில் எழுந்துள்ளது.
மற்ற அணிகளும் தங்களது தக்கவைக்கப்பட்ட வீரர்களின் பட்டியலை டிசம்பர் 15ஆம் தேதிக்குள் வெளியிடும் என எதிர்பார்க்கப்படுகிறது.
