டெல்லி செங்கோட்டை அருகே திங்கள்கிழமை மாலை நடந்த கார் குண்டுவெடிப்பு சம்பவத்தில், தற்கொலைத் தாக்குதல் நடத்தியதாக சந்தேகிக்கப்படும் மருத்துவர் உமர் முகமது என்பவரின் புகைப்படம் வெளியிடப்பட்டுள்ளது. வெடித்துச் சிதறிய வெள்ளை நிற ஹூண்டாய் ஐ20 காரை அவர் இயக்கியதாக சிசிடிவி காட்சிகளில் பதிவு செய்யப்பட்டுள்ளது.
இதையடுத்து, உள்துறை அமைச்சர் அமித் ஷா தலைமையில் அவசர ஆலோசனைக் கூட்டம் நடைபெற்று வருகிறது. இதில் உள்துறை செயலர், உளவுத்துறை இயக்குநர் மற்றும் டெல்லி போலீஸ் கமிஷனர் உள்ளிட்டோர் பங்கேற்றுள்ளனர்.
🔹 யார் இந்த உமர் முகமது?
உமர் முகமது ஜம்மு & காஷ்மீரின் புல்வாமாவில் 1989 பிப்ரவரி 24 அன்று பிறந்தவர். அவர் அல் ஃபலா மருத்துவக் கல்லூரியில் மருத்துவராகப் பணிபுரிந்தார்.
பயங்கரவாத நடவடிக்கைகளில் கைது செய்யப்பட்ட அதீல் அகமது ராதர், முஜம்மில் ஷகீல் ஆகியோரின் நெருங்கிய கூட்டாளி எனக் கூறப்படுகிறது. பரிதாபாத்தில் சமீபத்தில் 2,900 கிலோ வெடிபொருட்கள் கைப்பற்றப்பட்டதும், உமர் அங்கிருந்து தப்பிச் சென்றதாக புலனாய்வுத் துறையினர் தெரிவித்துள்ளனர்.
🔹 தாக்குதல் எப்படி நடந்தது?
புலனாய்வு வட்டாரங்களின் தகவல்படி, உமர் மற்றும் அவரது குழுவினர் அமோனியம் நைட்ரேட் எரிபொருள் எண்ணெய் (ANFO) பயன்படுத்தி காரில் வெடிபொருள் வைத்துள்ளனர். செங்கோட்டை அருகிலுள்ள நெரிசலான பகுதியில் டெட்டனேட்டர் மூலம் வெடிப்பு நடத்தப்பட்டது.
சிசிடிவி காட்சிகள், HR 26CE 7674 என்ற எண்ணைக் கொண்ட காரை பதர்பூர் எல்லையிலிருந்து டெல்லிக்குள் நுழையும் போது பதிவு செய்துள்ளன. கார் மாலை 3:19 மணிக்கு வாகன நிறுத்துமிடத்துக்குள் நுழைந்து, 6:48 மணிக்கு புறப்பட்டதும் உடனே வெடித்தது. உமர் காரை விட்டு வெளியேறாததும் உறுதிப்படுத்தப்பட்டுள்ளது.
🔹 கார் கைமாற்றங்கள்
விசாரணையில், அந்த கார் பலமுறை உரிமையாளர் மாறியிருப்பது தெரியவந்துள்ளது.
மார்ச் 2025ல் சல்மான் காரை தேவேந்தருக்கு விற்றார். பின்னர், அக்டோபர் 29 அன்று அது ஆமிர் எனும் நபருக்கும், பின்னர் தாரிக் மற்றும் உமர் ஆகியோருக்கும் சென்றது.
ஆமிர், உமரின் சகோதரர் என கூறப்படுகிறது. ஆமிர் கார் சாவியை வைத்திருக்கும் புகைப்படங்கள் தற்போது விசாரணையில் முக்கிய ஆதாரமாகக் கருதப்படுகின்றன.
🔹 தொடர்புடைய கைது நடவடிக்கைகள்
பரிதாபாத்தில் பல மருத்துவர்கள் பயங்கரவாத தாக்குதல் திட்டமிட்டதாக கைது செய்யப்பட்டுள்ளனர். அதில், அனந்த்நாக் அரசு மருத்துவக் கல்லூரி மருத்துவர் அதீல் அகமது ராதர் மற்றும் முஜம்மில் ஷகீல் முக்கியர்கள்.
அதீலின் லாக்கரில் இருந்து ஏகே-47 துப்பாக்கி மற்றும் வெடிமருந்துகள் கைப்பற்றப்பட்டன. இருவரும் UAPA சட்டத்தின் கீழ் சிறையில் அடைக்கப்பட்டுள்ளனர்.
மேலும், பெண் மருத்துவர் டாக்டர் ஷாஹீன் ஷாஹித் மற்றும் அகமது மொகியுதீன் சயீத் ஆகியோரும் தனித்தனியாக வெடிபொருள் மற்றும் ஆயுதங்களுடன் கைது செய்யப்பட்டுள்ளனர்.
