‘நாயகன்’ மறுவெளியீட்டுக்கு தடை இல்லை: உயர் நீதிமன்றம் மறுப்பு
கமல்ஹாசன் நடித்த ‘நாயகன்’ திரைப்படத்தின் மறுவெளியீட்டுக்கு தடை விதிக்க முடியாது என சென்னை உயர் நீதிமன்றம் தெரிவித்துள்ளது.
மணிரத்னம் இயக்கத்தில் கமல்ஹாசன் நடித்த ‘நாயகன்’ 1987ஆம் ஆண்டு வெளியானது. கமல்ஹாசனின் பிறந்தநாளை முன்னிட்டு இந்த படத்தை மீண்டும் திரையிட திட்டமிடப்பட்டுள்ளது.
இதை எதிர்த்து எஸ்.ஆர்.பிலிம் பேக்டரி நிறுவன உரிமையாளர் எஸ்.ஆர். ராஜன் மனு தாக்கல் செய்தார். அதில், “நாயகன் படத்தின் வெளியீட்டு உரிமையை 2023ஆம் ஆண்டு எங்கள் நிறுவனம் பெற்றுள்ளது. ஆனால், வி.எஸ்.பிலிம் இன்டர்நேஷனல் நிறுவனம் இந்த தகவலை மறைத்து தமிழகம், கேரளா, கர்நாடகாவில் மறுவெளியீடு செய்ய முயற்சிக்கிறது. எனவே மறுவெளியீட்டுக்கு தடை விதிக்க வேண்டும்,” எனக் கோரினார்.
இதற்கு வி.எஸ்.பிலிம் இன்டர்நேஷனல் தரப்பில் ஆஜரான வழக்கறிஞர் விஜயன் சுப்பிரமணியன், “மறுவெளியீட்டுக்கான அதிகாரப்பூர்வ ஒப்பந்தம் எங்களிடம் உள்ளது; காப்புரிமை சட்டம் மீறப்படவில்லை,” என வாதிட்டார்.
வழக்கை விசாரித்த நீதிபதி என். செந்தில்குமார், “நாயகன் திரைப்படத்தை நான் 15 முறை பார்க்கிறேன்; ஒவ்வொரு காட்சியையும் நினைவில் வைத்திருக்கிறேன்,” எனக் கூறி, தற்போது மறுவெளியீட்டுக்கு தடை விதிக்க தேவையில்லை என்று தெரிவித்தார்.
அதுடன், சம்பந்தப்பட்ட தயாரிப்பு நிறுவனங்களுக்கும், விநியோக உரிமையாளர் நிறுவனங்களுக்கும் நோட்டீஸ் பிறப்பித்து, வழக்கை பிறிதொரு தேதிக்கு ஒத்திவைத்தார்
