அதிவேக 50 மில்லியன் பார்வைகள் — ராம்சரண் ‘பெட்டி’ படத்தின் ‘சிக்கிரி சிக்கிரி’ பாடல் புதிய சாதனை!
ஹைதராபாத்: நடிகர் ராம்சரண் நடிப்பில் உருவாகி வரும் ‘பெட்டி’ படத்தின் முதல் சிங்கிள் பாடல் ‘சிக்கிரி சிக்கிரி’ இந்திய இசை உலகில் புதிய சாதனையை பதிவு செய்துள்ளது.
வெளியானது 24 மணி நேரத்திலேயே, இந்த பாடல் அதிவேகமாக 50 மில்லியன் பார்வைகள் எட்டிய இந்திய பாடலாக பெயர் பெற்றுள்ளது. இதன் மூலம் ‘புஷ்பா’, ‘ஜவான்’ போன்ற ஹிட் படப் பாடல்களின் சாதனையை முறியடித்துள்ளது.
‘பெட்டி’ படத்தை புச்சிபாபு சனா இயக்கியுள்ளார். இதில் ராம்சரணுக்கு ஜோடியாக ஜான்வி கபூர் நடித்துள்ளார். இசையமைப்பாளர் ஏ.ஆர். ரஹ்மான் இந்த படத்திற்கு இசை வழங்கியுள்ளார். படம் அடுத்த ஆண்டு மார்ச் 26 அன்று திரையரங்குகளில் வெளியாகிறது.
சுவாரஸ்யமாக, இதற்கு முன்பு தனுஷ் நடித்த ‘தேரே இஷ்க் மெய்ன்’ பாடல் அதிவேக பார்வை சாதனையைப் பெற்றிருந்தது. அதற்கும் இசையமைத்தவர் ஏ.ஆர். ரஹ்மானே என்பதால், தன்னுடைய சாதனையை தானே முறியடித்துள்ளார் என்ற பெருமையும் ரஹ்மானுக்கு கிடைத்துள்ளது.
தற்போது ‘சிக்கிரி சிக்கிரி’ மற்றும் ‘தேரே இஷ்க் மெய்ன்’ பாடல்கள் இரண்டும் சமூக வலைதளங்களில் ட்ரெண்டிங்கில் இடம்பிடித்து, ரசிகர்களிடையே வைரலாகி வருகின்றன.
