ஆஸ்திரேலியாவுடன் இன்று முதல் ஒருநாள் மோதல்: ஷுப்மன் கில் தலைமையில் இந்திய அணி களமிறக்கம்
இந்திய கிரிக்கெட் அணி தற்போது ஆஸ்திரேலியாவில் சுற்றுப்பயணம் மேற்கொண்டு வருகிறது. இந்த பயணத்தின் பகுதியாக நடைபெறும் மூன்று ஒருநாள் போட்டிகளில் முதலாவது ஆட்டம் இன்று காலை 9 மணிக்கு பெர்த் நகரில் உள்ள ஆப்டஸ் மைதானத்தில் நடைபெறுகிறது. இப்போட்டியில் இந்திய அணி புதிய கேப்டனான ஷுப்மன் கில் தலைமையில் களமிறங்குகிறது.
பல மாதங்களுக்குப் பிறகு ரோஹித் சர்மா மற்றும் விராட் கோலி ஆகிய சீனியர் வீரர்கள் மீண்டும் சர்வதேச கிரிக்கெட்டில் களமிறங்குகின்றனர். டி20 மற்றும் டெஸ்ட் வடிவிலிருந்து ஓய்வு பெற்றுள்ள இவர்கள் இனிமேல் ஒருநாள் போட்டிகளில் மட்டுமே விளையாட முடிவு செய்துள்ளனர்.
இதனால் ரசிகர்கள் இருவரின் ஆட்டத்தை ஆவலுடன் எதிர்நோக்கி உள்ளனர். ஆஸ்திரேலிய தொடருக்காக இருவரும் தீவிரமாக பயிற்சி மேற்கொண்டுள்ளனர். ரோஹித் சர்மா உடல் எடையை குறைத்து மும்பையில் அபிஷேக் நாயர் உதவியுடன் பயிற்சி செய்தார். விராட் கோலி லண்டனில் தனியார் பயிற்சியாளரின் வழிகாட்டுதலில் தயாரானார்.
இருவருக்கும் பெரிய சவால் — ஐபிஎல் முடிந்தபின் நீண்ட இடைவெளிக்குப் பிறகு சர்வதேச போட்டியில் களமிறங்குவதே. எனினும், இருவரும் ஆஸ்திரேலியாவுக்கு எதிராக சிறப்பாக விளையாடிய அனுபவம் கொண்டவர்கள்.
இவர்கள் இருவரும் 2027 உலகக் கோப்பை வரை விளையாடும் நோக்கம் கொண்டுள்ளனர். அதற்கான தொடக்கமாக இந்த ஆஸ்திரேலிய தொடர் அமையக்கூடும். இப்போது கேப்டனாக இல்லாவிட்டாலும், ரோஹித் சர்மா சீனியர் வீரராக அணிக்குத் துணைபுரிய உள்ளார்.
ரோஹித் சர்மா கடைசியாக இந்திய அணிக்கு டி20 மற்றும் ஒருநாள் போட்டிகளில் ஐசிசி கோப்பைகளை வென்றுக் கொடுத்தார். மெல்பர்னில் நடைபெற்ற தனது கடைசி டெஸ்ட் போட்டியிலும் அவர் கேப்டனாக இருந்தார். விராட் கோலி மீண்டும் ரன்வேட்டை தொடங்க முடிந்தால், ரோஹித் சர்மா தனது தாக்கமிகு தொடக்கத்தால் எதிரணிக்கு அழுத்தம் கொடுக்கக்கூடும். இவர்கள் இருவரும் உலகக் கோப்பை வரை அணியில் தங்கள் இடத்தை உறுதிசெய்ய முடியும்.
இப்போது தேர்வாளர்களும் அணி நிர்வாகமும் 2027 உலகக் கோப்பை நோக்கி எதிர்காலத்தைக் கட்டமைக்க விரும்புகிறார்கள். அதே நேரத்தில், ரோஹித் மற்றும் கோலி தலைமைப் பொறுப்பிலிருந்து விலகியிருப்பதால் எந்தவித அழுத்தமும் இல்லாமல் தங்கள் திறனை வெளிப்படுத்த முடியும்.
மறுபுறம், புதிய கேப்டனாக ஷுப்மன் கில்லுக்கு இந்த தொடர் ஒரு பெரிய சவாலாக இருக்கும். அணியை மறுசீரமைத்து அடுத்த தலைமுறைக்குத் தள்ளிச் செல்ல வேண்டிய பொறுப்பு அவர்மீது உள்ளது. ரோஹித் சர்மா, விராட் கோலி ஆகியோர் அவருக்கு ஆதரவாக இருப்பார்கள் என எதிர்பார்க்கப்படுகிறது.
26 வயதான ஷுப்மன் கில், இங்கிலாந்து டெஸ்ட் தொடரில் கேப்டனாகவும் பேட்ஸ்மேனாகவும் சிறந்து விளங்கியவர். தற்போது அவர் தனது ஒருநாள் கேப்டன்ஷிப் பயணத்தை வெளிநாட்டு மண்ணில் தொடங்குகிறார். ரோஹித் சர்மா தலைமையில் இந்திய அணி ஒருநாள் போட்டிகளில் 75% வெற்றி விகிதத்தை பெற்றிருந்தது. இதேபோல் செயல்திறனை நிலைநிறுத்த கில் முனைப்பாக இருப்பார்.
ஆஸ்திரேலிய அணியில் கேப்டனாக மிட்செல் மார்ஷ் களமிறங்குகிறார். முக்கிய வேகப்பந்து வீச்சாளரான பாட் கம்மின்ஸ் காயம் காரணமாக பங்கேற்கவில்லை. ஆனால் மிட்செல் ஸ்டார்க், ஜோஷ் ஹேசில்வுட் போன்ற வேகப்பந்து வீச்சாளர்கள் இந்திய பேட்டிங் வரிசைக்கு சவால் விடக்கூடும். பேட்டிங்கில் டிராவிஸ் ஹெட், மார்னஷ் லபுஷேன், கூப்பர் கானொலி, மேத்யூ ரென்ஷா ஆகியோர் ஆஸ்திரேலிய அணிக்கு பலம் சேர்க்கின்றனர்.
இந்திய அணியில் தொடக்க வீரர்களாக ஷுப்மன் கில் மற்றும் ரோஹித் சர்மா களமிறங்குவர். பின்னர் விராட் கோலி, ஸ்ரேயஸ் ஐயர், கே.எல்.ராகுல் ஆகியோர் வரிசையில் விளையாடுவார்கள். ஆல்ரவுண்டராக நித்திஷ் குமார் ரெட்டி (வேகப்பந்து), அக்சர் படேல் (சுழற்பந்து) ஆகியோர் இடம் பெறலாம். பிரதான சுழற்பந்து வீச்சாளராக குல்தீப் யாதவ் இருப்பார். வேகப்பந்து வீச்சில் முகமது சிராஜ், அர்ஷ்தீப் சிங், பிரசித் கிருஷ்ணா அல்லது ஹர்ஷித் ராணா ஆகியோர் தேர்வாகலாம்.
