“இந்திரா காந்திக்கு பிரதமர் மோடியை விட அதிக தைரியம்” — ராகுல் காந்தி விமர்சனம்
பிஹாரின் நாளந்தாவில் நடைபெற்ற பொதுக்கூட்டத்தில் பேசிய காங்கிரஸ் எம்.பி. ராகுல் காந்தி, முன்னாள் பிரதமர் இந்திரா காந்தியின் தைரியத்தை தற்போதைய பிரதமர் நரேந்திர மோடியுடன் ஒப்பிட்டு விமர்சித்தார்.
1971 வங்கதேசப் போரின் போது, அமெரிக்கா இந்தியாவை அச்சுறுத்த கடற்படையும் விமானப்படையையும் அனுப்பியபோதும், இந்திரா காந்தி எந்தப்படியும் அஞ்சாமல் உறுதியான பதில் அளித்தார் என ராகுல் தெரிவித்தார்.
அப்போது இந்திரா காந்தி, “எங்களுக்கு பயமில்லை, நீங்கள் செய்ய வேண்டியது செய்யுங்கள், நாங்கள் எங்கள் கடமையை செய்வோம்” என்று அமெரிக்காவிடம் கண்டனம் தெரிவித்ததையும் அவர் குறிப்பிட்டார்.
அதனை தொடர்ந்து ராகுல் காந்தி கூறுகையில்,
“இந்திரா காந்தி ஒரு பெண்; ஆனால் மோடியை விட அதிக தைரியம் கொண்டவர். நரேந்திர மோடிக்கு அமெரிக்க அதிபரை நேரடியாக எதிர்கொள்ளும் திறமோ, பார்வையோ இல்லை” என்று கடுமையாக விமர்சித்தார்.
மேலும், முன்னாள் அமெரிக்க அதிபர் டொனால்டு ட்ரம்பின் ‘ஆபரேஷன் சிந்தூர்’ குறித்த கருத்தை எதிர்த்து பேச முடியாததற்காகவும் மோடியை ராகுல் குற்றம் சாட்டினார்.
“ட்ரம்ப் பல முறை மோடியைப் பற்றி அவமதிப்பான வார்த்தைகள் பயன்படுத்தியும், மோடி அதை எதிர்த்து பேசவில்லை. அவருக்கு தைரியம் இருந்தால், அமெரிக்க அதிபர் பொய் சொல்கிறார் என்று பொதுக்கூட்டத்தில் கூறட்டும்” எனச் சவால் விடுத்தார்.
