அமெரிக்கா – ஈரான் பேச்சுவார்த்தை தோல்வி: “எங்கள் நிபந்தனைகளை ஈரான் ஏற்கவில்லை” – ஜே.டி. வான்ஸ் வருத்தம்!
இஸ்லாமாபாத்:
பாகிஸ்தானில் நடைபெற்ற வரலாற்றுச் சிறப்புமிக்க அமெரிக்கா – ஈரான் அமைதிப் பேச்சுவார்த்தையில் எவ்வித உடன்பாடும் எட்டப்படவில்லை என்றும், ஈரான் அமெரிக்காவின் நிபந்தனைகளை ஏற்க மறுத்துவிட்டதாகவும் அமெரிக்கத் துணை அதிபர் ஜே.டி. வான்ஸ் அதிகாரப்பூர்வமாக அறிவித்துள்ளார்.
முன்னேற்றம் இல்லாத பேச்சுவார்த்தை
இஸ்லாமாபாத்தில் நடைபெற்ற இந்தப் பேச்சுவார்த்தைக்குப் பிறகு செய்தியாளர்களைச் சந்தித்த ஜே.டி. வான்ஸ் கூறியதாவது:
“ஈரானியர்கள் எங்களது நிபந்தனைகளை ஏற்றுக்கொள்வதற்குத் தயாராக இருக்கும் ஒரு நிலையை எங்களால் எட்டவே முடியவில்லை. நாங்கள் மிகவும் இணக்கமான முறையிலேயே பேச்சுவார்த்தையை நடத்தினோம். ஆனால், துரதிர்ஷ்டவசமாக இதில் எவ்வித முன்னேற்றமும் ஏற்படவில்லை.”
ட்ரம்ப்பின் அறிவுறுத்தல்
இந்தப் பேச்சுவார்த்தை குறித்து அதிபர் ட்ரம்ப் வழங்கிய வழிகாட்டுதல்களை நினைவுகூர்ந்த அவர், “நம்பிக்கையுடன் ஒரு நல்ல ஒப்பந்தத்தை எட்டுவதற்கு உங்களால் இயன்ற மிகச்சிறந்த முயற்சிகளை மேற்கொள்ள வேண்டும் என்று அதிபர் ட்ரம்ப் எங்களுக்கு அறிவுறுத்தி இருந்தார். அந்த அடிப்படையில் நாங்கள் எங்களால் முடிந்தவரை முயற்சி செய்தோம். எனினும், ஈரான் தரப்பில் அதற்குச் சாதகமான பதில் இல்லை” என்று தெரிவித்தார்.
நீடிக்கும் பதற்றம்
ஈரான் முன்வைத்த 10 அம்சத் திட்டங்களுக்குப் பதிலாக அமெரிக்கா விதித்த கடுமையான கட்டுப்பாடுகளை ஈரான் நிராகரித்துள்ளதாகத் தெரிகிறது. இந்தப் பேச்சுவார்த்தை தோல்வியடைந்ததைத் தொடர்ந்து, தற்காலிகப் போர் நிறுத்தம் முடிவுக்கு வருமா அல்லது அமெரிக்கா தனது இராணுவ நடவடிக்கைகளைத் தீவிரப்படுத்துமா என்ற அச்சம் உலக நாடுகளிடையே எழுந்துள்ளது.
முன்னதாக, பேச்சுவார்த்தை தோல்வியடைந்தால் அமெரிக்கக் கப்பல்கள் ஈரானைத் தாக்கத் தயாராக இருக்கும் என்று அதிபர் ட்ரம்ப் எச்சரித்திருந்தது குறிப்பிடத்தக்கது. இதனால் மத்திய கிழக்கு நாடுகளில் மீண்டும் போர் மேகங்கள் சூழத் தொடங்கியுள்ளன.
