ஊழல் செய்தவர்கள் சிறை செல்வது உறுதி” – மேற்கு வங்கத்தில் 6 ‘மோடி கியாரண்டி’களை அறிவித்தார் பிரதமர்!
மேற்கு வங்க மாநிலம் ஹால்டியாவில் நடைபெற்ற பிரம்மாண்ட பொதுக்கூட்டத்தில் உரையாற்றிய பிரதமர் நரேந்திர மோடி, திரிணாமுல் காங்கிரஸ் அரசை மிகக் கடுமையாகச் சாடினார். “மேற்கு வங்கத்தை ஊழல்களால் சுரண்டியவர்கள் ஒருவரையும் மோடி விடமாட்டான்; அவர்கள் அனைவரும் சட்டத்தின் முன் நிறுத்தப்பட்டு சிறைக்கு அனுப்பப்படுவார்கள்” என்று அவர் ஆவேசமாகத் தெரிவித்தார்.
தனது உரையில், மேற்கு வங்க மக்களின் முன்னேற்றத்திற்காக 6 முக்கிய உறுதிமொழிகளை (Modi’s Guarantees) பிரதமர் வழங்கினார்:
- அச்சமற்ற சூழல்: வன்முறை மற்றும் பய உணர்வை நீக்கி, மக்கள் நிம்மதியாக வாழும் வகையில் சட்டத்தின் ஆட்சி நிலைநாட்டப்படும்.
- பெண்கள் பாதுகாப்பு: பெண்களுக்கு எதிரான குற்றங்கள் மீது கடும் நடவடிக்கை எடுக்கப்பட்டு, அவர்கள் பாதுகாப்பாக வாழும் சூழல் உருவாக்கப்படும். பாலியல் குற்றங்கள் தொடர்பான அனைத்து வழக்குகளும் மீண்டும் திறக்கப்பட்டு விசாரணை நடத்தப்படும்.
- ஊழலுக்கு முற்றுப்புள்ளி: திரிணாமுல் ஆட்சியில் நடைபெற்ற அனைத்து ஊழல் மற்றும் முறைகேடுகள் குறித்த கோப்புகளும் மீண்டும் திறக்கப்படும். ஊழலில் ஈடுபட்டவர் அமைச்சராக இருந்தாலும் சரி, அதிகாரியாக இருந்தாலும் சரி, அவர்கள் தப்பிக்க முடியாது.
- ஊடுருவல்காரர்கள் வெளியேற்றம்: மாநிலத்தில் உள்ள சட்டவிரோத ஊடுருவல்காரர்கள் கண்டறியப்பட்டு வெளியேற்றப்படுவார்கள். அதேசமயம், அகதிகளுக்கு உரிய உரிமைகள் வழங்கப்படும்.
- அரசு ஊழியர்களுக்குப் பயன்: பாஜக ஆட்சி அமைந்தவுடன், மாநில அரசு ஊழியர்களுக்கு 7-வது ஊதியக் குழுவின் பரிந்துரைகள் உடனடியாக அமல்படுத்தப்படும்.
- நிர்வாகப் பொறுப்பு: மக்களிடம் நேர்மையாகவும், பொறுப்புடனும் பதிலளிக்கக்கூடிய வெளிப்படையான நிர்வாகம் உறுதி செய்யப்படும்.
“மேற்கு வங்கம் ஒரு காலத்தில் தொழில்துறையின் மையமாக இருந்தது; ஆனால் இன்று இளைஞர்கள் வேலை தேடி வெளிமாநிலங்களுக்குச் செல்லும் அவலம் நிலவுகிறது. இந்த நிலையை மாற்றி, மேற்கு வங்கத்தை மீண்டும் ஒரு முன்னேறிய மாநிலமாக மாற்றுவதே பாஜகவின் நோக்கம்” என்று பிரதமர் மோடி தனது உரையில் குறிப்பிட்டார்.
