காதலுக்காக உயிரை மாய்த்த மகன்: 22 ஆண்டுகளாகத் திருமணம் செய்து வைத்துப் பெற்றோர் நெகிழ்ச்சி வழிபாடு!
தெலங்கானா மாநிலம் மஹபூபாபாத் மாவட்டத்தில், மறைந்த காதலர்களுக்குப் பெற்றோர் ஆண்டுதோறும் திருமணம் செய்து வைக்கும் ஒரு விசித்திரமான மற்றும் நெகிழ்ச்சியான சடங்கு அனைவரின் கவனத்தையும் ஈர்த்துள்ளது. லாலு – சுக்கம்மா தம்பதியினரின் மகன் ராம்கோட்டி, கடந்த 2003-ம் ஆண்டு தான் காதலித்த பெண்ணின் வீட்டார் திருமணத்திற்கு எதிர்ப்பு தெரிவித்ததால் மனமுடைந்து தற்கொலை செய்துகொண்டார். அவரைத் தொடர்ந்து அந்தப் பெண்ணும் தனது உயிரை மாய்த்துக்கொண்டார்.
இந்தத் துயரச் சம்பவத்திற்குப் பிறகு, தனது கனவில் தோன்றிய மகன் தனக்கும் தன் காதலிக்கும் திருமணம் செய்து வைத்து ஒரு கோயில் எழுப்புமாறு கேட்டதாகத் தாய் சுக்கம்மா தெரிவித்துள்ளார். மகனின் இந்த இறுதி ஆசையை நிறைவேற்றும் விதமாக, கடந்த 22 ஆண்டுகளாகத் தங்கள் வீட்டிலேயே இருவருக்கும் சிறிய கோயில் போன்ற அமைப்பை உருவாக்கி, ஆண்டுதோறும் அவர்களுக்குத் திருமணம் செய்து வைப்பதைப் பெற்றோர் வழக்கமாகக் கொண்டுள்ளனர். ஒரு குடும்பத்தின் தனிப்பட்ட துயரமாகத் தொடங்கிய இந்தச் சடங்கு, தற்போது அந்த கிராமமே ஒன்றிணைந்து கொண்டாடும் ஒரு முக்கிய விழாவாக மாறியுள்ளது. இதில் திரளான கிராம மக்கள் கலந்துகொண்டு அந்தத் தம்பதியினரின் அன்பை கௌரவித்து வருகின்றனர்.
