திருவாரூர் தியாகராஜ சுவாமி கோயில் ஆழித்தேரோட்டம்: ‘ஆரூரா.. தியாகேசா..’ முழக்கமிட்டு ஆயிரக்கணக்கான பக்தர்கள் வடம் பிடித்தனர்!
திருவாரூர் தியாகராஜ சுவாமி கோயிலின் உலகப் புகழ்பெற்ற பங்குனி உத்திரப் பெருவிழாவின் சிகர நிகழ்ச்சியான ஆழித்தேரோட்டம் இன்று கோலாகலமாக நடைபெற்றது. கடந்த 6-ஆம் தேதி கொடியேற்றத்துடன் தொடங்கிய இந்த விழாவில், நாள்தோறும் சுவாமிக்குச் சிறப்பு அபிஷேக ஆராதனைகள் மற்றும் பூஜைகள் நடைபெற்று வந்தன.
தேரோட்டம் தொடக்கம்:
RelatedPosts
விழாவின் முக்கிய நிகழ்வான தேரோட்டத்தையொட்டி, இன்று அதிகாலை 5 மணி அளவில் விநாயகர் மற்றும் சுப்ரமணியர் தேர்களுக்குச் சிறப்பு பூஜைகள் செய்யப்பட்டு, பக்தர்கள் வடம் பிடிக்கத் தேரோட்டம் தொடங்கியது. இதனைத் தொடர்ந்து, காலை 9.05 மணி அளவில் ஆசியாவிலேயே மிகப்பெரிய தேரான ஆழித்தேருக்கு மகா தீபாராதனை காட்டப்பட்டு, சிறப்புப் பூஜைகள் நடைபெற்றன.
பக்தர்கள் தரிசனம்:
ஆழித்தேர் அசைந்தாடி வரத் தொடங்கியதும், அங்கு திரண்டிருந்த ஆயிரக்கணக்கான பக்தர்கள் “ஆரூரா.. தியாகேசா..” எனப் பக்தி முழக்கமிட்டபடி தேரை வடம் பிடித்து இழுத்தனர். நான்கு வீதிகளிலும் பிரம்மாண்டமாக வலம் வந்த ஆழித்தேரைக் காணத் தமிழகத்தின் பல்வேறு பகுதிகளில் இருந்தும் திரளான பக்தர்கள் வருகை தந்து சாமி தரிசனம் செய்தனர். திருவாரூர் நகரமே விழாக்கோலம் பூண்டுள்ள நிலையில், அசம்பாவிதங்கள் தவிர்க்கப் பலத்த போலீஸ் பாதுகாப்புப் போடப்பட்டிருந்தது.
