ஈரான் உச்ச தலைவர் கமேனி கொல்லப்பட்ட விவகாரம்: சிசிடிவி ஹேக்கிங் முதல் AI பகுப்பாய்வு வரை – அம்பலமாகும் பகீர் தகவல்கள்!
டெஹ்ரான் / டெல் அவிவ்:
ஈரானின் உச்ச தலைவர் அயதுல்லா அலி கமேனி கடந்த பிப்ரவரி 28, 2026 அன்று தெஹ்ரானில் உள்ள அவரது இல்லத்தில் நடத்தப்பட்ட துல்லியமான வான்வழித் தாக்குதலில் கொல்லப்பட்டார். இந்தத் தாக்குதல் எவ்வாறு நடத்தப்பட்டது என்பது குறித்து தற்போது வெளியாகியுள்ள தகவல்கள் உலக நாடுகளை உலுக்கியுள்ளன.
சிசிடிவி கேமராக்கள் மூலம் உளவு:
ஈரான் அரசு தனது நாட்டு மக்களைக் கண்காணிக்கவும், போராட்டக்காரர்களை அடையாளம் காணவும் தெஹ்ரான் வீதிகள், கடைகள் மற்றும் வாகன நிறுத்துமிடங்களில் ஆயிரக்கணக்கான அதிநவீன சிசிடிவி கேமராக்களைப் பொருத்தியிருந்தது. ஆனால், இந்தச் சிசிடிவி அமைப்பையே இஸ்ரேலின் உளவு அமைப்பான மொசாட் மற்றும் அதன் மின்னணுப் போர் பிரிவான ‘யூனிட் 8200’ (Unit 8200) பல ஆண்டுகளாக ஹேக் செய்து தங்கள் கட்டுப்பாட்டில் வைத்திருந்ததாகக் கூறப்படுகிறது.
RelatedPosts
AI தொழில்நுட்பத்தின் பங்கு:
ஹேக் செய்யப்பட்ட கேமராக்கள் மூலம் திரட்டப்பட்ட பல்லாயிரக்கணக்கான மணிநேர வீடியோ பதிவுகளை இஸ்ரேல் செயற்கை நுண்ணறிவு (AI) தொழில்நுட்பம் மூலம் பகுப்பாய்வு செய்துள்ளது. இதன் மூலம் கமேனியின் பாதுகாப்பு வளையத்தில் இருந்த மெய்க்காப்பாளர்கள், அவர்களின் வாகனங்கள் மற்றும் அவர்கள் வழக்கமாகப் பயணிக்கும் பாதைகள் குறித்த ‘Pattern of Life’ எனப்படும் வாழ்க்கை முறையைத் துல்லியமாகக் கண்டறிந்துள்ளனர்.
தாக்குதல் நடந்த விதம்:
கமேனியின் இருப்பிடத்தை உறுதி செய்த பின், இஸ்ரேல் மற்றும் அமெரிக்கா இணைந்து நடத்திய அந்தத் துல்லியத் தாக்குதலில் கமேனியின் குடும்ப உறுப்பினர்கள் மற்றும் முக்கிய பாதுகாப்பு அதிகாரிகளும் கொல்லப்பட்டதாகத் தெரிகிறது. ஈரானின் மொபைல் போன் கோபுரங்கள் மற்றும் தகவல்தொடர்பு சாதனங்கள் முடக்கப்பட்டதால், தாக்குதலுக்கு முன்பு எவ்வித எச்சரிக்கையும் பாதுகாப்புப் படையினருக்குக் கிடைக்கவில்லை.
பலமுறை பாதுகாப்பு ஓட்டைகள் குறித்து எச்சரிக்கப்பட்டும், ஈரான் அவற்றைச் சரிசெய்யத் தவறியதே இந்த மிகப்பெரிய பின்னடைவுக்குக் காரணம் எனப் பாதுகாப்பு நிபுணர்கள் கருதுகின்றனர். தற்போது கமேனியின் மகன் மொஜ்தபா கமேனி (Mojtaba Khamenei) ஈரானின் புதிய உச்ச தலைவராகப் பொறுப்பேற்றுள்ளதாகத் தகவல்கள் தெரிவிக்கின்றன.
