மேற்கு வங்கத்தில் 2 கட்டங்களாகச் சட்டமன்றத் தேர்தல்: ஏப்ரல் 23 மற்றும் 29-ல் வாக்குப்பதிவு!
கொல்கத்தா:
மேற்கு வங்க மாநிலத்திற்கான சட்டமன்றத் தேர்தல் தேதிகளை இந்தியத் தலைமைத் தேர்தல் ஆணையர் ஞானேஷ் குமார் அதிகாரப்பூர்வமாக அறிவித்துள்ளார். பாதுகாப்பு மற்றும் நிர்வாகக் காரணங்களைக் கருத்தில் கொண்டு, இந்த முறை மேற்கு வங்கத்தில் இரண்டு கட்டங்களாக வாக்குப்பதிவு நடத்தப்பட உள்ளது. அனைத்துக் கட்டங்களிலும் பதிவாகும் வாக்குகள் வரும் மே 4-ஆம் தேதி எண்ணப்பட்டு முடிவுகள் அறிவிக்கப்படும்.
முதற்கட்டத் தேர்தல் (ஏப்ரல் 23):
முதற்கட்டத் தேர்தலுக்கான வேட்புமனுத் தாக்கல் மார்ச் 30-ஆம் தேதி தொடங்கி ஏப்ரல் 6-ஆம் தேதி வரை நடைபெறவுள்ளது. தாக்கல் செய்யப்பட்ட மனுக்கள் மீதான பரிசீலனை ஏப்ரல் 7-ஆம் தேதி நடைபெறும் என்றும், மனுக்களைத் திரும்பப் பெற ஏப்ரல் 9-ஆம் தேதி கடைசி நாள் என்றும் அறிவிக்கப்பட்டுள்ளது. இதனைத் தொடர்ந்து ஏப்ரல் 23-ஆம் தேதி முதற்கட்ட வாக்குப்பதிவு நடைபெறும்.
இரண்டாம் கட்டத் தேர்தல் (ஏப்ரல் 29):
இரண்டாம் கட்டத் தேர்தலுக்கான வேட்புமனுத் தாக்கல் ஏப்ரல் 2-ஆம் தேதி தொடங்கி ஏப்ரல் 9-ஆம் தேதி நிறைவடைகிறது. வேட்புமனுப் பரிசீலனை ஏப்ரல் 10-ஆம் தேதியும், மனுக்களை வாபஸ் பெற ஏப்ரல் 13-ஆம் தேதியும் இறுதி நாளாக நிர்ணயிக்கப்பட்டுள்ளது. இதனைத் தொடர்ந்து ஏப்ரல் 29-ஆம் தேதி இரண்டாம் கட்ட வாக்குப்பதிவு நடைபெறும். கடந்த முறை பல கட்டங்களாக நடைபெற்ற தேர்தல், இந்த முறை இரண்டே கட்டங்களாகக் குறைக்கப்பட்டிருப்பது அம்மாநில அரசியல் கட்சிகளிடையே கவனத்தைப் பெற்றுள்ளது.
