வளைகுடாப் போர் பதற்றம்: ஈரான் அதிபருடன் பிரதமர் மோடி அவசரத் தொலைபேசி உரையாடல்!
ஈரான் மீது அமெரிக்கா மற்றும் இஸ்ரேலியப் படைகள் தொடர்ந்து 14-வது நாளாகத் தாக்குதல் நடத்தி வரும் இக்கட்டான போர்ச் சூழலுக்கு இடையே, இந்தியப் பிரதமர் நரேந்திர மோடி ஈரான் அதிபர் மசூத் பெஷேஷ்கியானுடன் தொலைபேசி வாயிலாக ஆலோசனையில் ஈடுபட்டார். இந்த உரையாடலின் போது, ஈரானில் அதிகரித்து வரும் பதற்றங்கள், அப்பாவிப் பொதுமக்கள் உயிரிழப்பு மற்றும் உள்கட்டமைப்புகளுக்கு ஏற்பட்டுள்ள பெரும் சேதங்கள் குறித்து இரு தலைவர்களும் தங்கள் ஆழ்ந்த கவலையைப் பரிமாறிக் கொண்டனர். குறிப்பாக, ஈரானில் உள்ள இந்தியக் குடிமக்களின் பாதுகாப்பு, தடையற்ற எரிசக்திப் போக்குவரத்து மற்றும் ஏற்றுமதி வர்த்தகம் பாதிக்கப்படாமல் இருப்பது குறித்துப் பிரதமர் மோடி விரிவாக விவாதித்தார். மேலும், வளைகுடா நாடுகளில் நிலவும் இந்த மோதலை அமைதியான முறையிலும், ராஜாங்க ரீதியிலான பேச்சுவார்த்தைகள் மூலமாகவும் மட்டுமே தீர்க்க முடியும் என்ற இந்தியாவின் உறுதியான நிலைப்பாட்டை அதிபரிடம் வலியுறுத்தியதாகப் பிரதமர் மோடி தனது ‘எக்ஸ்’ (X) தளத்தில் பதிவிட்டுள்ளார்.
