வீடியோ கேம் இனி நிஜம்: சீனாவில் உருவான பிரம்மாண்ட ‘டெம்பிள் ரன்’ சாகச தளம்!
உலகப்புகழ் பெற்ற ‘டெம்பிள் ரன்’ மொபைல் கேமைப் போன்றே, நிஜ உலகிலும் ஒரு சாகச அனுபவத்தைச் சீன அரசு உருவாக்கியுள்ளது. சீனாவின் தென்மேற்குப் பகுதியில் உள்ள குய்சோ மாகாணத்தில், இயற்கையாக அமைந்த பிரம்மாண்டமான பாதாளக் குழிக்குள் (Sinkhole) இந்த விளையாட்டுத் தளம் அமைக்கப்பட்டுள்ளது. தரைமட்டத்திலிருந்து நூற்றுக்கணக்கான அடி ஆழத்தில் அமைந்துள்ள இந்தப் பள்ளத்தில், கேமில் வருவது போன்றே குறுகிய மரப்பாலங்கள், பாறைகளுக்கு இடையே வளைந்து செல்லும் பாதைகள் மற்றும் செங்குத்தான படிக்கட்டுகள் தத்ரூபமாக உருவாக்கப்பட்டுள்ளன.
இந்தச் சாகசத்தின் உச்சகட்டமாக, பயணிகள் ஒரு முனையிலிருந்து மறுமுனைக்குக் கயிறு (Zipline) மூலம் பறந்து செல்லும் வசதியும் செய்யப்பட்டுள்ளது. பார்ப்பதற்கு மிகவும் ஆபத்தானதாகத் தெரிந்தாலும், சாகச விரும்பிகள் அனைவரும் நவீன பாதுகாப்பு உபகரணங்கள் மற்றும் தலைக்கவசம் அணிந்தே அனுமதிக்கப்படுகின்றனர். ஒரு வீடியோ கேம் உலகிற்குள் நேரடியாக நுழைந்தது போன்ற உணர்வைத் தருவதால், சீனா முழுவதிலும் இருந்து ஆயிரக்கணக்கான இளைஞர்கள் இந்த இடத்திற்குப் படையெடுத்து வருகின்றனர். குய்சோ மாகாணத்தின் இயற்கை எழிலுடன் கூடிய இந்த ‘நிஜ உலக டெம்பிள் ரன்’ தற்போது சமூக வலைதளங்களில் வைரலாகி வருகிறது.
