தெஹ்ரி ஏரியில் அதிரடி: இந்திய விமானப்படை மற்றும் ராணுவம் இணைந்து பிரம்மாண்ட கூட்டுப் பயிற்சி!
உத்தரகாண்ட் மாநிலத்தின் மிக உயரமான அணையான தெஹ்ரி அணையின் நீர்த்தேக்கப் பகுதியில், இந்திய விமானப்படை மற்றும் இந்திய ராணுவம் இணைந்து தங்களது போர்த்திறனை வெளிப்படுத்தும் வகையிலான பிரம்மாண்டமான கூட்டுப் பயிற்சியை வெற்றிகரமாக நடத்தியுள்ளன. இந்திய விமானப்படையின் வலிமைமிக்க C-130J சூப்பர் ஹெர்குலஸ் விமானம் மூலம் பறந்த வீரர்கள், மிக அதிக உயரத்தில் இருந்து வரிசையாகப் பாராசூட் மூலம் குதித்து, எதிரியின் இலக்குகளைத் துல்லியமாகத் தாக்கும் வியூகங்களைப் பயிற்சி செய்தனர்.
மலைப்பாங்கான நிலப்பரப்புகளில் உள்ள ஏரிகள் மற்றும் நீர்நிலைகளை ஊடுருவல் பாதைகளாகப் பயன்படுத்தி, எவ்வித முன்னறிவிப்புமின்றி எதிரி முகாம்களைத் தாக்கும் நவீனப் போர் யுக்திகளைச் சிறப்புப் படை வீரர்கள் இச்சமயம் செய்து காட்டினர். இரு படைகளுக்கும் இடையிலான ஒருங்கிணைப்பை வலுப்படுத்தும் விதமாகவும், இக்கட்டான சூழல்களில் நீர்நிலைகள் வழியாகப் படைகளை விரைவாக நகர்த்தும் திறனை மேம்படுத்தும் விதமாகவும் இந்தப் பயிற்சி அமைந்தது.
