இயற்கையின் அதிசயம்: 13,560 கி.மீ இடைவிடாமல் பறந்து உலக சாதனை படைத்த ‘பி6’ பறவை!
உணவு, தண்ணீர் அல்லது எவ்வித ஓய்வுமின்றி அலாஸ்காவிலிருந்து டாஸ்மேனியா வரை சுமார் 13,560 கிலோமீட்டர் தூரத்தை 11 நாட்களில் கடந்து, ‘பி6’ என்ற இளம் பறவை புதிய உலக சாதனையைப் படைத்துள்ளது. ‘பார்-டெய்ல்ட் காட்விட்’ (Bar-tailed Godwit) என்ற இந்த வகை ஆர்க்டிக் கடற்கரைப் பறவைகள், வழக்கமாகத் தங்களது இடப்பெயர்வுக்காக 11,000 கிலோமீட்டர் தூரத்தைப் பயணிக்கக் கூடியவை. ஆனால், தற்போது ‘பி6’ பறவை 13,500 கி.மீ-க்கும் அதிகமான தூரத்தைக் கடந்து முந்தைய சாதனைகளை முறியடித்துள்ளது.
இந்தப் பறவைகள் இத்தகைய நீண்ட பயணத்திற்காக, அலாஸ்காவிலேயே அதிகப்படியான உணவை உட்கொண்டு தங்கள் உடல் எடையில் பாதியளவு கொழுப்பைச் சேமித்துக் கொள்கின்றன. பயணத்தின் போது இவை ‘யுனிஹெமிஸ்பெரிக் ஸ்லீப்’ (Unihemispheric sleep) எனும் முறையில் உறங்குவதாகவும், இவற்றின் கண்களில் உள்ள ‘கிரிப்டோக்ரோம்ஸ்’ எனும் புரதம் பூமியின் காந்தப்புலத்தைக் கண்டறிந்து சரியான திசையில் பயணிக்க உதவுவதாகவும் ஆய்வாளர்கள் தெரிவிக்கின்றனர். பருநிலை மாற்றங்களால் இத்தகைய பறவைகளின் வாழ்வாதாரம் அச்சுறுத்தலுக்கு உள்ளாகி வரும் நிலையில், ‘பி6’-ன் இந்தச் சாதனைப் பயணம் இயற்கை பாதுகாப்பின் அவசியத்தை உலகிற்குப் பறைசாற்றுகிறது.
