கமேனி மரணத்திற்கு பதிலடி: குவைத்தில் உள்ள அமெரிக்க தூதரகம் மீது ஈரான் அதிரடி டிரோன் தாக்குதல்!
குவைத் சிட்டி:
மத்திய கிழக்கில் ஈரான் மற்றும் இஸ்ரேல் இடையிலான போர் மூன்றாவது நாளாகத் தீவிரமடைந்துள்ள நிலையில், குவைத்தில் உள்ள அமெரிக்க தூதரகம் மீது ஈரான் நடத்திய டிரோன் தாக்குதலால் பெரும் பரபரப்பு ஏற்பட்டுள்ளது.
தாக்குதலின் பின்னணி:
ஈரானின் உச்ச மதத் தலைவர் கமேனி கொல்லப்பட்டதற்குப் பழிவாங்கும் நடவடிக்கையாக, அமெரிக்க ஆதரவு பெற்ற வளைகுடா நாடுகள் மீது ஈரான் தொடர் அச்சுறுத்தல்களை விடுத்து வருகிறது. குறிப்பாகக் குவைத், கத்தார், சவுதி அரேபியா மற்றும் பஹ்ரைன் ஆகிய நாடுகளில் உள்ள அமெரிக்கத் தளங்களை இலக்கு வைத்து ஈரான் டிரோன் தாக்குதல்களை நடத்தி வருகிறது.
தூதரகத்தில் தீ விபத்து:
இதன் ஒரு பகுதியாக, இன்று குவைத் தலைநகரில் அமைந்துள்ள அமெரிக்கத் தூதரகத்தைக் குறிவைத்து டிரோன் தாக்குதல் நடத்தப்பட்டது. இதில் தூதரகக் கட்டிடம் பலத்த சேதமடைந்து தீப்பிடித்து எரிந்தது. கட்டிடத்திலிருந்து அடர்த்தியான கரும்புகை வெளியேறியதை அடுத்து, குவைத் நகரம் முழுவதும் அபாயச் சங்குகள் (Sirens) முழங்கின. சம்பவ இடத்திற்குப் பாதுகாப்புப் படையினரும், ஆம்புலன்ஸ்களும் விரைந்து வந்து மீட்புப் பணிகளில் ஈடுபட்டுள்ளனர்.
அமெரிக்கா எச்சரிக்கை:
இந்தத் தாக்குதலைத் தொடர்ந்து, குவைத்தில் உள்ள தனது நாட்டு குடிமக்களுக்கு அமெரிக்க அரசு அவசர எச்சரிக்கை விடுத்துள்ளது. தாக்குதலுக்குள்ளான தூதரகப் பகுதிக்கு யாரும் செல்ல வேண்டாம் என்றும், பாதுகாப்பான இடங்களிலேயே இருக்குமாறும் அறிவுறுத்தப்பட்டுள்ளது. இச்சம்பவம் வளைகுடா நாடுகளில் நிலவும் போர் பதற்றத்தை மேலும் உச்சத்திற்குக் கொண்டு சென்றுள்ளது.
