வரலாறு படைத்த குடியரசுத் தலைவர்: உள்நாட்டு ‘பிரசந்த்’ போர் ஹெலிகாப்டரில் திரெளபதி முர்மு பயணம்!
ஜெய்சால்மர்: இந்தியக் குடியரசுத் தலைவர் திரெளபதி முர்மு, உள்நாட்டிலேயே தயாரிக்கப்பட்ட ‘பிரசந்த்’ (Prachand) இலகுரக போர் ஹெலிகாப்டரில் (LCH) துணை விமானியாகப் பயணித்து புதிய சாதனை படைத்துள்ளார். ராஜஸ்தான் மாநிலம் ஜெய்சால்மர் விமானப் படைத் தளத்தில் இருந்து புறப்பட்ட அவர், சுமார் 25 நிமிடங்கள் விண்ணில் பறந்து நகரின் முக்கியப் பகுதிகளை வான்வழியாகப் பார்வையிட்டார். ஆலிவ் பச்சை நிற விமானப் படை உடை மற்றும் ஹெல்மெட் அணிந்து கம்பீரமாகப் பயணித்த அவரை, விமானப் படை அதிகாரிகள் உற்சாகமாக வரவேற்றனர்.
ஏற்கனவே ரஃபேல் மற்றும் சுகோய்-30 எம்கேஐ போன்ற அதிநவீன போர் விமானங்களில் பயணித்துள்ள குடியரசுத் தலைவர் முர்மு, இந்தியாவிலேயே தயாரிக்கப்பட்ட ஒரு போர் விமானத்தில் (Indigenous Combat Aircraft) பறக்கும் முதல் குடியரசுத் தலைவர் என்ற பெருமையைப் பெற்றுள்ளார். இந்தியாவின் பாதுகாப்புத் துறை தன்னிறைவு பெற்று வருவதையும், ‘மேக் இன் இந்தியா’ திட்டத்தின் வலிமையையும் உலகிற்குப் பறைசாற்றும் விதமாக இந்தப் பயணம் அமைந்துள்ளதாகப் பாதுகாப்புத் துறை வட்டாரங்கள் தெரிவிக்கின்றன.
