பற்றி எரியும் மெக்சிகோ: போதைக்கடத்தல் மன்னன் ‘எல் மென்சோ’ சுட்டுக்கொலை – வன்முறைச் சுழலில் 5 மாநிலங்கள்!
மெக்சிகோ சிட்டி:
உலகின் மோஸ்ட் வாண்டட் போதைப்பொருள் கடத்தல் கும்பல் தலைவன் ‘எல் மென்சோ’ (El Mencho), மெக்சிகோ சிறப்புப் படையினரால் சுட்டுக்கொல்லப்பட்டார். இதனைத் தொடர்ந்து, மெக்சிகோவின் ஐந்து முக்கிய மாநிலங்களில் கடத்தல் கும்பல்கள் வெறித்தனமான தாக்குதலில் ஈடுபட்டு வருவதால், அந்நாடே போர்க்களம் போலக் காட்சியளிக்கிறது.
யார் இந்த எல் மென்சோ? (பின்னணி):
- ஆரம்பகால வாழ்க்கை: 1966-ல் மெக்சிகோவின் அகுயில்லாவில் பிறந்த எல் மென்சோ, வறுமை காரணமாகச் சட்டவிரோதமாக அமெரிக்காவிற்குள் நுழைந்து சான் பிரான்சிஸ்கோவில் வசித்து வந்தார்.
- குற்றப்பின்னணி: 19 வயதிலேயே துப்பாக்கி வைத்திருந்த வழக்கில் கைதாகி நாடு கடத்தப்பட்ட அவர், மீண்டும் அமெரிக்கா சென்று 1992-ல் போதைப்பொருள் வழக்கில் 3 ஆண்டுகள் சிறை தண்டனை பெற்றார். பின்னர் மெக்சிகோ திரும்பிய அவர், வியக்கத்தக்க வகையில் ஜாலிஸ்கோ காவல் துறையில் சேர்ந்தார்.
- சாம்ராஜ்யத்தின் உருவாக்கம்: காவல் பணியை விட்டு வெளியேறிய பின், ‘மிலேனியோ’ கடத்தல் கும்பலில் சேர்ந்தார். 2009-ல் தனது சொந்த அமைப்பான ‘ஜாலிஸ்கோ நியூ ஜெனரேஷன் கார்டெல்’ (CJNG) என்ற போதைப்பொருள் சாம்ராஜ்யத்தை நிறுவினார். இது 40-க்கும் மேற்பட்ட நாடுகளில் கிளைகளைக் கொண்டுள்ளது.
அசுர பலம் கொண்ட CJNG கும்பல்:
சுமார் 20,000 உறுப்பினர்களைக் கொண்ட இந்த கும்பல், வெடிபொருட்களை வீச ட்ரோன்களைப் பயன்படுத்துவது, ராணுவ ஹெலிகாப்டர்களையே சுட்டு வீழ்த்துவது என ஒரு நிழல் ராணுவமாகவே செயல்பட்டு வந்தது. அமெரிக்கா இவரைப் பிடிக்க ₹136 கோடி சன்மானம் அறிவித்திருந்தது. பிப்ரவரி மாதம் அமெரிக்கா இந்த அமைப்பை ஒரு பயங்கரவாத அமைப்பாக அறிவித்தது.
இறுதி வேட்டை:
மெக்சிகோ ராணுவம் ‘டபல்பா ஜாலிஸ்கோ’ பகுதியில் எல் மென்சோ பதுங்கியிருப்பதை அறிந்து அதிரடித் தாக்குதல் நடத்தியது. துப்பாக்கிச் சண்டையில் படுகாயமடைந்த அவரை ஹெலிகாப்டர் மூலம் அழைத்து வரும் வழியில் அவர் உயிரிழந்ததாக அதிகாரப்பூர்வமாக அறிவிக்கப்பட்டுள்ளது.
தற்போதைய பதற்றம்:
தனது தலைவன் கொல்லப்பட்ட ஆத்திரத்தில், கடத்தல் கும்பல் மெக்சிகோவைச் சிதைத்து வருகிறது:
- தீக்கிரையான நகரங்கள்: ஜாலிஸ்கோ மற்றும் குவாடலஜாரா உள்ளிட்ட பகுதிகளில் பேருந்துகள் மற்றும் வாகனங்கள் தீயிட்டுக் கொளுத்தப்பட்டுள்ளன.
- விமான நிலையங்கள் மூடல்: சுற்றுலாத் தலமான புவேர்ட்டோ வல்லார்ட்டா (Puerto Vallarta) புகைமண்டலமாகக் காட்சியளிக்கிறது. விமான நிலையங்கள் மூடப்பட்டு, மக்கள் பீதியில் ஓடும் காட்சிகள் சமூக வலைதளங்களில் வைரலாகி வருகின்றன.
- பாதுகாப்பு எச்சரிக்கை: நிலைமை சீராகும் வரை மக்கள் வெளியே வர வேண்டாம் என ஆளுநர் பாப்லோ லெமஸ் நவரோ கேட்டுக்கொண்டுள்ளார். மெக்சிகோவில் உள்ள இந்தியர்கள் மிகுந்த எச்சரிக்கையுடன் இருக்குமாறு இந்தியத் தூதரகம் அறிவுறுத்தியுள்ளது.
சர்வாதிகாரியைப் போலச் செயல்பட்ட ஒரு தலைவன் வீழ்த்தப்பட்டாலும், அவன் உருவாக்கிய வன்முறை இயந்திரம் தற்போது மெக்சிகோவைப் பிடியில் வைத்துள்ளது. அடுத்த தலைவர் யார் என்ற அதிகாரப் போட்டியில் வன்முறை மேலும் அதிகரிக்கக்கூடும் என அஞ்சப்படுகிறது.
