‘ஒரே நாடு ஒரே தேர்தல்’ வலுவான நிர்வாகத்திற்கு வழிவகுக்கும்: குடியரசு துணைத் தலைவர் சி.பி.ராதாகிருஷ்ணன் உரை
புதுடெல்லி: ‘ஒரே நாடு ஒரே தேர்தல்’ கொள்கையைச் செயல்படுத்துவது, அரசு நிர்வாகங்கள் தயக்கமின்றி வலுவான முடிவுகளை எடுக்கவும், நீண்டகால வளர்ச்சித் திட்டங்களில் முழு கவனம் செலுத்தவும் பெரிதும் உதவும் என்று குடியரசு துணைத் தலைவர் சி.பி.ராதாகிருஷ்ணன் தெரிவித்துள்ளார். டெல்லி பாரத் மண்டபத்தில் ‘டைம்ஸ் ஆஃப் இந்தியா’ குழுமம் சார்பில் நடைபெற்ற சமூகப் பொறுப்பு நிதிக்கான (CSR) தேசிய மாநாட்டில் சிறப்பு விருந்தினராகக் கலந்துகொண்டு அவர் உரையாற்றினார்.
நிகழ்ச்சியில் பேசிய அவர், இந்தியாவில் மேற்கொள்ளப்பட்டு வரும் பல்வேறு சீர்திருத்தங்கள் குறித்துப் பாராட்டுகளைத் தெரிவித்தார். குறிப்பாக, வணிகத்தை எளிதாக்குதல் (Ease of Doing Business), டிஜிட்டல் நிர்வாகம் மற்றும் ஜிஎஸ்டி (GST) போன்ற முக்கியக் கொள்கை மாற்றங்கள், அரசு நிர்வாகத்தின் மீது மக்கள் கொண்டுள்ள நம்பிக்கையையும் வெளிப்படைத்தன்மையையும் பன்மடங்கு வலுப்படுத்தியுள்ளதாக அவர் குறிப்பிட்டார்.
நாட்டின் ஒட்டுமொத்த மக்களும் பொறுப்புடன் ஜனநாயகப் பணிகளில் பங்கேற்பதை உறுதி செய்வதில் தேர்தல் செயல்முறைகள் மிக முக்கியப் பங்கு வகிக்கின்றன என்று அவர் சுட்டிக்காட்டினார். அடிக்கடி தேர்தல் நடைபெறுவதைத் தவிர்த்து, ‘ஒரே நாடு ஒரே தேர்தல்’ முறையைக் கொண்டு வருவதன் மூலம், நிர்வாகத் தேக்கநிலை நீங்கி, நாட்டின் எதிர்காலத்திற்கான நிலையான கொள்கைகளை வகுக்க முடியும் என்று சி.பி.ராதாகிருஷ்ணன் தனது உரையில் வலியுறுத்தினார்.
