உலக பொருளாதார வளர்ச்சியில் இந்தியா முன்னணி – நிர்மலா சீதாராமன் பெருமிதம்
உலக பொருளாதார வளர்ச்சியில் இந்தியா முக்கியமான இடத்தைப் பெற்றுள்ளதாக மத்திய நிதியமைச்சர் நிர்மலா சீதாராமன் தெரிவித்துள்ளார்.
சர்வதேச நாணய நிதியம் (IMF) 2026 ஆம் ஆண்டுக்கான உலகப் பொருளாதார வளர்ச்சி தொடர்பான புள்ளிவிவரங்களை அண்மையில் வெளியிட்டது. இந்த புள்ளிவிவரங்கள் உலக நாடுகளின் வளர்ச்சி பங்களிப்பை விளக்கும் வகையில் அமைந்துள்ளன.
இந்தத் தரவுகளை உலகின் முன்னணி தொழிலதிபரும் பணக்காரருமான எலான் மஸ்க் தனது சமூக வலைதளமான எக்ஸ் (X) பக்கத்தில் பகிர்ந்திருந்தார். குறிப்பாக, உலக பொருளாதார வளர்ச்சியில் இந்தியாவின் பங்களிப்பை வெளிப்படுத்தும் வரைபடத்தை பதிவிட்ட அவர், “சக்தியின் சமநிலை மாறி வருகிறது” என்ற கருத்தையும் வெளியிட்டிருந்தார்.
இந்த நிலையில், எலான் மஸ்கின் அந்த பதிவை மேற்கோள் காட்டிய மத்திய நிதியமைச்சர் நிர்மலா சீதாராமன், இந்தியாவின் பொருளாதார வலிமையை இந்த தரவுகள் தெளிவாக எடுத்துக்காட்டுகின்றன என தெரிவித்துள்ளார்.
RelatedPosts
மேலும், சீனாவுக்கு அடுத்தபடியாக இந்தியா அதிவேகமாக வளர்ந்து வரும் பொருளாதாரமாக உருவெடுத்து வருவதாகவும், உலக பொருளாதார அமைப்பில் இந்தியா இன்று முக்கியமான மற்றும் தவிர்க்க முடியாத இடத்தை பிடித்துள்ளதாகவும் அவர் குறிப்பிட்டார்.
உலகளாவிய மொத்த உள்நாட்டு உற்பத்தி (GDP) வளர்ச்சியில் இந்தியா மட்டும் 17 சதவீத பங்களிப்பை வழங்கி வருவதாகவும், இந்த பங்களிப்பு அமெரிக்கா மற்றும் ஐரோப்பிய நாடுகளை விட அதிகமாக இருப்பதாகவும் நிர்மலா சீதாராமன் தெரிவித்தார்
