500 சதவீத வரிவிதிப்பு அச்சம் – திருப்பூர் பின்னலாடைத் துறைக்கு சலுகைகள் வழங்க ஏற்றுமதியாளர்கள் கோரிக்கை
அமெரிக்கா இந்திய தயாரிப்புகளுக்கு விதிக்கவுள்ளதாக அறிவிக்கப்பட்டுள்ள 500 சதவீத வரிவிதிப்பு மசோதா திருப்பூர் பின்னலாடை ஏற்றுமதி துறையில் பெரும் அதிர்ச்சியையும், அச்சத்தையும் ஏற்படுத்தியுள்ளது. ஏற்கனவே அதிகரித்துள்ள வரிவிதிப்புகளால் பாதிப்பை சந்தித்து வரும் பின்னலாடை ஏற்றுமதியாளர்கள், இந்த புதிய வரிவிதிப்பு அமலுக்கு வந்தால் ஏற்றுமதி முழுமையாக முடங்கும் அபாயம் இருப்பதாக கவலை தெரிவித்துள்ளனர்.
ரஷ்யாவிடமிருந்து கச்சா எண்ணெய் வாங்குவதை இந்தியா நிறுத்த வேண்டும் என்ற அரசியல் மற்றும் பொருளாதார அழுத்தத்தின் பின்னணியில், இந்தியாவிலிருந்து அமெரிக்காவுக்கு ஏற்றுமதி செய்யப்படும் பொருட்களுக்கு ஏற்கனவே 50 சதவீதம் வரை வரி விதிக்கப்பட்டுள்ளது. இதன் காரணமாக மட்டும், ஆயத்த ஆடைத் துறையில் சுமார் 6 ஆயிரம் கோடி ரூபாய் வரையிலான இழப்பு ஏற்பட்டுள்ளதாக தொழில் வட்டாரங்கள் தெரிவிக்கின்றன.
இந்த நிலையில், இந்திய தயாரிப்புகள் மீது 500 சதவீதம் வரை வரிவிதிக்க வழிவகுக்கும் மசோதாவுக்கு அமெரிக்க அதிபர் டொனால்ட் ட்ரம்ப் ஒப்புதல் அளித்துள்ளதாக வெளியான தகவல், திருப்பூர் ஏற்றுமதியாளர்கள் மத்தியில் பெரும் கலக்கத்தை ஏற்படுத்தியுள்ளது.
இந்த புதிய வரிவிதிப்பு நடைமுறைக்கு வந்தால், இந்தியாவிலிருந்து அமெரிக்காவுக்கு பின்னலாடை ஏற்றுமதி செய்வது முற்றிலும் சாத்தியமற்ற நிலை உருவாகும் என ஏற்றுமதியாளர்கள் வேதனையுடன் தெரிவிக்கின்றனர்.
திருப்பூர் பின்னலாடை தொழில் நகரம் ஆண்டுதோறும் அமெரிக்கா, ஐரோப்பா, ஆப்பிரிக்கா, ஆஸ்திரேலியா உள்ளிட்ட பல்வேறு நாடுகளுக்கு சுமார் 45 ஆயிரம் கோடி ரூபாய் மதிப்பிலான ஆடைகளை ஏற்றுமதி செய்து வருகிறது. இதில், அமெரிக்காவுக்கு மட்டும் 20 ஆயிரம் கோடி ரூபாய்க்கும் அதிகமான பின்னலாடைகள் ஏற்றுமதி செய்யப்படுகின்றன.
இந்நிலையில், ஏற்கனவே 50 சதவீத வரிவிதிப்பால் பாதிக்கப்பட்டுள்ள நிலையில், 500 சதவீத வரி அமலுக்கு வந்தால் திருப்பூரின் பின்னலாடைத் தொழில் கடுமையான வீழ்ச்சியை சந்திக்கும் என்றும், பல ஆயிரக்கணக்கான நிறுவனங்கள் மூடப்படும் அபாயம் உருவாகும் என்றும் தெரிவிக்கப்படுகிறது.
இதன் நேரடி விளைவாக, பல லட்சம் தொழிலாளர்கள் வேலை இழக்கும் சூழ்நிலை உருவாகும் என்பதால் தொழிலாளர்களின் வாழ்வாதாரம் பெரிதும் பாதிக்கப்படும் என்ற அச்சமும் எழுந்துள்ளது.
இந்தச் சூழலில், அமெரிக்காவின் இந்த வரிவிதிப்பு முடிவால் ஏற்படும் இழப்புகளை ஈடுசெய்ய, மத்திய மற்றும் மாநில அரசுகள் உடனடி மற்றும் உறுதியான நடவடிக்கைகளை மேற்கொள்ள வேண்டும் என பின்னலாடை ஏற்றுமதியாளர்கள் கோரிக்கை விடுத்துள்ளனர்.
குறிப்பாக,
- ஜவுளி மற்றும் பின்னலாடைத் துறைக்கென தனி நிவாரண மற்றும் ஊக்கத்தொகை திட்டங்கள் அறிவிக்க வேண்டும்,
- பின்னலாடை உற்பத்தியாளர்களுக்கு வழங்கப்பட்டுள்ள வங்கி கடன்களை தள்ளுபடி செய்ய வேண்டும் அல்லது மறுசீரமைப்பு செய்ய வேண்டும்,
- இந்தியாவின் வரியில்லா வர்த்தக ஒப்பந்தங்களை (Free Trade Agreement) மேலும் பல நாடுகளுக்கு விரிவுபடுத்த வேண்டும்,
- ஏற்றுமதியாளர்களுக்கு வரி சலுகைகள், மானியங்கள் மற்றும் ஊக்குவிப்பு திட்டங்கள் வழங்க வேண்டும்
என பல்வேறு கோரிக்கைகளையும் அவர்கள் முன்வைத்துள்ளனர்.
அமெரிக்காவின் இந்த கடுமையான வரிவிதிப்பு முடிவு, திருப்பூரின் பின்னலாடைத் துறையின் எதிர்காலத்தையே கேள்விக்குறியாக்கும் நிலையை உருவாக்கியுள்ளதாக தொழில் வட்டாரங்கள் எச்சரிக்கை விடுத்துள்ளன. எனவே, இந்திய அரசுகள் உடனடியாக தலையிட்டு பின்னலாடைத் துறையை காக்க நடவடிக்கை எடுக்க வேண்டும் என்பதே ஏற்றுமதியாளர்களின் ஒருமித்த கோரிக்கையாக உள்ளது.
