குஜராத் சோமநாதர் ஆலயத்தில் சுயமரியாதை விழா – பிரதமர் மோடி பங்கேற்று வழிபாடு
குஜராத் மாநிலத்தில் அமைந்துள்ள புனிதமான சோமநாதர் சிவாலயத்தில் நடைபெற்ற சுயமரியாதை திருவிழாவில் பிரதமர் நரேந்திர மோடி கலந்து கொண்டு சிறப்பு பிரார்த்தனையில் ஈடுபட்டார்.
குஜராத் மாநிலம் சோம்நாத் மாவட்டத்தில் உள்ள சோமநாதர் கோயில், இந்திய வரலாற்றில் தனிச்சிறப்புடைய புனிதத் தலமாக விளங்குகிறது. கி.பி. 1026 ஆம் ஆண்டில் இந்த ஆலயம் மீது நிகழ்ந்த படையெடுப்பின் ஆயிரம் ஆண்டை நினைவுகூரும் வகையில், தற்போது சுயமரியாதை திருவிழா நடத்தப்பட்டு வருகிறது.
கஜினி முகமது பலமுறை இந்த ஆலயத்தை இடித்தழித்தபோதும், இந்து சமூகம் தன்னம்பிக்கையுடன் மீண்டும் மீண்டும் அதே இடத்தில் கோயிலை எழுப்பிய வரலாற்றை போற்றும் வகையில், இந்த விழாவிற்கு “சுயமரியாதை திருவிழா” எனப் பெயரிடப்பட்டுள்ளது.
இந்த விழாவின் ஒரு பகுதியாக, கடந்த 8 ஆம் தேதி முதல் தொடர்ந்து 72 மணி நேரங்கள் ஓம்கார மந்திரம் இடைவிடாமல் உச்சரிக்கப்படும் ஆன்மிக நிகழ்வு நடைபெற்று வருகிறது.
இந்த நிலையில், விழாவில் கலந்து கொண்ட பிரதமர் மோடிக்கு கோயில் நிர்வாகம் சார்பில் மரியாதையுடன் வரவேற்பு அளிக்கப்பட்டது. அவர் நாட்டின் நலன் மற்றும் மக்களின் அமைதி வேண்டி சோமநாதர் சிவனை மனமுருகி வழிபட்டார்.
தொடர்ந்து நடைபெற்ற ஓம்கார மந்திர உச்சாடன நிகழ்ச்சியில் பிரதமர் நேரடியாக பங்கேற்று மந்திரங்களை உச்சரித்து தமது பிரார்த்தனையை நிறைவேற்றினார்.
இதனைத் தொடர்ந்து, சுமார் 3,000 ட்ரோன்கள் பங்கேற்ற பிரமாண்டமான ட்ரோன் காட்சி நடைபெற்றது. இதில் சோமநாதர் கோயிலின் தொன்மையான வரலாறு, அதன் மீளுருவாக்கம் மற்றும் சிவபெருமானின் பல்வேறு வடிவங்கள் கண்கவர் வகையில் வானில் காட்சிப்படுத்தப்பட்டன.
ட்ரோன் நிகழ்ச்சி நிறைவடைந்த பின்னர், பிரதமர் மோடி திரிசூலத்தை உயர்த்திப் பிடித்தபோது, வண்ணமயமான வாணவேடிக்கைகள் வானத்தை அலங்கரித்து விழாவிற்கு உச்சக்கட்ட மகிழ்ச்சியை அளித்தன.
அதனைத் தொடர்ந்து, சோமநாதர் கோயில் அறக்கட்டளையின் தலைவராக உள்ள பிரதமர் மோடி தலைமையில் முக்கிய ஆலோசனைக் கூட்டம் நடைபெற்றது. இந்தக் கூட்டத்தில், கோயிலின் ஆயிரம் ஆண்டு வரலாற்றை வெளிப்படுத்தும் நவீன அருங்காட்சியக கட்டுமான பணிகளின் முன்னேற்றம் குறித்தும், பக்தர்களுக்கான அடிப்படை வசதிகளை மேலும் மேம்படுத்துவது குறித்தும் விரிவாக ஆலோசிக்கப்பட்டது.
மேலும், வெளிநாட்டு மற்றும் பிற மாநிலங்களில் இருந்து வரும் பக்தர்களின் வசதிக்காக பல மொழிகளில் ஆடியோ வழிகாட்டி சேவைகள் மற்றும் டிஜிட்டல் தகவல் திரைகள் அமைப்பது தொடர்பாகவும் கூட்டத்தில் விவாதிக்கப்பட்டது.
