இந்தியா–சீனா நெருக்கத்தைத் தடுக்கும் முயற்சியா? – அமெரிக்கா மீது சீனாவின் கடும் குற்றச்சாட்டு

இந்தியா–சீனா நெருக்கத்தைத் தடுக்கும் முயற்சியா? – அமெரிக்கா மீது சீனாவின் கடும் குற்றச்சாட்டு

இந்தியா மற்றும் சீனா இடையே உருவாகி வரும் சுமூக உறவுகளை பாதிக்கும் நோக்கில், அமெரிக்கா திட்டமிட்டு பொய்யான தகவல்களை பரப்புகிறது என சீனா குற்றம்சாட்டியுள்ளது. குறிப்பாக, இந்தியா–சீனா எல்லை விவகாரத்தில் வெளிநாடுகள் தலையிடுவதை சீனா கடுமையாக எதிர்த்துள்ளது.

அமெரிக்க பாதுகாப்புத் துறை, “People’s Republic of China தொடர்பான இராணுவ மற்றும் பாதுகாப்பு முன்னேற்றங்கள்” என்ற தலைப்பில் தனது ஆண்டு பாதுகாப்பு அறிக்கையை அந்நாட்டு நாடாளுமன்றத்தில் சமர்ப்பித்துள்ளது. இந்த அறிக்கையில் சீனாவின் ராணுவ வலிமை, பாதுகாப்பு கொள்கைகள் மற்றும் அண்டை நாடுகளுடனான உறவுகள் குறித்த மதிப்பீடுகள் இடம்பெற்றுள்ளன.

2049ஆம் ஆண்டுக்குள் “சீன தேசத்தின் மாபெரும் மறுமலர்ச்சி” என்ற இலக்கை அடைவதே சீனாவின் நீண்டகால தேசிய வியூகம் என அந்த அறிக்கையில் குறிப்பிடப்பட்டுள்ளது. அதேபோல், இந்தியா–சீனா உறவுகள், பாகிஸ்தானுடன் சீனாவின் பாதுகாப்பு ஒத்துழைப்பு மற்றும் பிராந்திய பாதுகாப்பு நிலவரங்கள் குறித்தும் விரிவாக விவரிக்கப்பட்டுள்ளன.

லடாக் பகுதியில் உள்ள எல்லைக் கட்டுப்பாட்டுக் கோடு அருகே பதற்றம் குறைந்ததைத் தொடர்ந்து, இந்தியாவுடன் சீனா உறவுகளை மேம்படுத்தி வருவதாக அந்த அறிக்கை தெரிவிக்கிறது. கடந்த ஆண்டு அக்டோபரில் நடைபெற்ற பிரிக்ஸ் உச்சி மாநாட்டில், சீன அதிபர் ஷி ஜின்பிங் மற்றும் இந்திய பிரதமர் நரேந்திர மோடி சந்திப்பதற்கு முன்பாகவே, இரு நாடுகளுக்கும் இடையே எல்லை தொடர்பான முக்கிய ஒப்பந்தம் கையெழுத்தானதாகவும் அதில் குறிப்பிடப்பட்டுள்ளது.

இந்த சந்திப்புக்குப் பிறகு, இந்தியா–சீனா இடையே மாதந்தோறும் உயர்மட்ட பேச்சுவார்த்தைகள் நடைபெற்று வருவதாகவும், அதன் விளைவாக எல்லைப் பகுதிகளில் பதற்றம் குறைந்துள்ளதுடன் நேரடி விமான சேவைகளும் மீண்டும் தொடங்கப்பட்டுள்ளதாகவும் அமெரிக்க பாதுகாப்புத் துறை தெரிவித்துள்ளது.

அதே நேரத்தில், சீன கம்யூனிஸ்ட் கட்சியின் கட்டுப்பாடு, சீனாவின் பொருளாதார வளர்ச்சி திட்டங்கள், இறையாண்மை தொடர்பான நிலைப்பாடுகள் மற்றும் அருணாச்சலப் பிரதேசம் உள்ளிட்ட பகுதிகளுக்கு சீனா உரிமை கோருவது போன்ற விஷயங்களில் சீனா உறுதியாக இருப்பதாக அந்த அறிக்கை கூறுகிறது. பரஸ்பர அவநம்பிக்கை தான் இந்தியா–சீனா இடையே நீடித்த சுமூக உறவுகள் உருவாகத் தடையாக இருப்பதாகவும் அதில் சுட்டிக்காட்டப்பட்டுள்ளது.

மேலும், பாகிஸ்தானுக்கு சீனா மேம்பட்ட போர் விமானங்கள் மற்றும் நீர்மூழ்கிக் கப்பல்கள் உள்ளிட்ட ஆயுதங்களை வழங்கி வருவதாகவும் அறிக்கையில் கூறப்பட்டுள்ளது. ஐந்தாம் தலைமுறை FC-31, நான்காம் தலைமுறை J-10C, JF-17 போர் விமானங்கள் மற்றும் யுவான் வகை நீர்மூழ்கிக் கப்பல்கள் வழங்கப்பட்டுள்ளன என்றும், 2020ஆம் ஆண்டு கையெழுத்தான சீனா–பாகிஸ்தான் உளவுத்துறை ஒப்பந்தமும் குறிப்பிடப்பட்டுள்ளது.

இந்த அமெரிக்க பாதுகாப்பு அறிக்கைக்கு சீனா கடும் எதிர்ப்பு தெரிவித்துள்ளது. சீன வெளியுறவுத் துறை செய்தித் தொடர்பாளர் லின் ஜியான், பென்டகனின் அறிக்கை சீனாவின் பாதுகாப்புக் கொள்கைகளை தவறாக சித்தரிப்பதாகவும், சீனாவுக்கும் பிற நாடுகளுக்கும் இடையே கருத்து வேறுபாடுகளை உருவாக்கும் நோக்கத்துடன் எழுதப்பட்டுள்ளதாகவும் குற்றம்சாட்டினார்.

இந்தியா–சீனா எல்லை விவகாரத்தில் எந்த வெளிநாடும் தலையிடுவதை சீனா ஒருபோதும் ஏற்காது என அவர் உறுதிபட கூறினார். இந்தியாவுடன் முரண்பாடுகளை உருவாக்க அமெரிக்கா முயற்சிக்கிறது என்றும், எல்லைப் பகுதியில் நிலைமை தற்போது நிலையானதாக உள்ளது என்றும் லின் ஜியான் தெரிவித்தார்.

அமெரிக்கா தனது உலகளாவிய ராணுவ மேலாதிக்கத்தை தக்கவைத்துக் கொள்ளவே இத்தகைய அறிக்கைகளை பயன்படுத்துகிறது என்றும், சீனா–இந்தியா உறவுகளில் ஏற்பட்டுவரும் முன்னேற்றத்தைத் தடுக்கும் வகையிலேயே இந்த பாதுகாப்பு அறிக்கை தயாரிக்கப்பட்டுள்ளதாகவும் சீன வெளியுறவுத் துறை தெரிவித்துள்ளது.