தேஜஸ்வியின் ‘ஜீவிகா தீதி’ வாக்குறுதிகள் பயனற்றவை: பாஜக – ஜேடியு கடுமையான விமர்சனம்
பிஹாரில் மகளிர் சுய உதவி குழு உறுப்பினர்களான ஜீவிகா தீதிகளுக்கு வாக்குறுதி அளித்த ஆர்ஜேடி தலைவர் தேஜஸ்வி யாதவ் மீது பாஜக மற்றும் ஜேடியு கட்சிகள் கடுமையாக விமர்சனம் மேற்கொண்டுள்ளன. மேலும், அவர் அளித்த அறிவிப்புகள் வரவிருக்கும் தேர்தல்களில் எந்தவித தாக்கத்தையும் ஏற்படுத்தாது எனவும் கூறியுள்ளனர்.
பிஹாரின் முன்னாள் துணை முதல்வர் தர்கிஷோர் பிரசாத் செய்தியாளர் சந்திப்பில் தெரிவித்ததாவது:
“பிஹார் மக்கள் தற்போது ஆர்ஜேடி மற்றும் மகாகட்பந்தன் கூட்டணியை நம்பவில்லை. அவர்கள் மீண்டும் ஆட்சிக்கு வரக்கூடாது என முடிவு செய்துவிட்டனர். எனவே தேஜஸ்வி யாதவின் அறிவிப்புகள் மக்களிடையோ, தேர்தல் முடிவுகளிலோ எந்தவித பாதிப்பையும் ஏற்படுத்தாது,” என்றார்.
அதேபோல் பாஜக மூத்த தலைவர் சுதான்ஷு திரிவேதி தெரிவித்ததாவது:
“பிஹார் மக்களை தேஜஸ்வி ஏளனமாக பார்க்கும் பழக்கத்தை நிறுத்த வேண்டும். நிதிஷ் குமார் அரசு ஆட்சிக்கு வந்த பின் பெண்கள் முன்னேற்றத்துக்காக பல திட்டங்கள் நடைமுறையில் வந்துள்ளன. மகளிர் அதிகாரமளிப்பு தொடர்பான பல நடவடிக்கைகள் கடந்த பத்து ஆண்டுகளாக நாங்கள் செயல்படுத்தி வருகிறோம்.
மகளிர் வளர்ச்சிக்காக எங்கள் கூட்டணி ஒரு நிலையான, நடைமுறைபூர்வமான அணுகுமுறையைக் கொண்டுள்ளது. தேஜஸ்வி 10 லட்சம் வேலைகளை வழங்குவதாக கூறுகிறார்; ஆனால் அதன் பொருள் ரூ.10 லட்சம் செலுத்தினால் தான் வேலை கிடைக்கும் என்பதாகும். முன்னர் வேலைக்காக நிலத்தை எடுத்தனர்; இப்போது வீடு, சொத்துக்களையும் கேட்கப் போகிறார்கள்,” என சாடினார்.
மூத்த ஜேடியு தலைவர் கே.சி. தியாகி கூறியதாவது:
“தேஜஸ்வி யாதவ் அளிக்கும் அனைத்து வாக்குறுதிகளும் வெறும் அரசியல் பிரசாரத்திற்காக மட்டுமே. பிஹார் அரசு ஏற்கனவே அந்த வகையான பல நலத்திட்டங்களை நிறைவேற்றி வருகிறது. எனவே அவர் கூறும் புதிய வாக்குறுதிகளுக்கு எந்த அர்த்தமும் இல்லை,” என்றார்.
இதற்கு முன்பு, பிஹாரில் மகா கூட்டணி ஆட்சிக்கு வந்தால், சமூக நலத்திட்டங்களில் பணிபுரியும் ஜீவிகா தீதிகளை நிரந்தர அரசு ஊழியர்களாக நியமித்து, அவர்களின் மாத ஊதியம் ரூ.30,000 ஆக உயர்த்தப்படும் என தேஜஸ்வி யாதவ் அறிவித்திருந்தார்.
