பிஹார் தேர்தல் 2025 | பெண்களுக்கு ₹2,500, அரசு வேலை, இலவச மின்சாரம்: மகா கூட்டணியின் தேர்தல் அறிக்கை வெளியீடு
பிஹார் சட்டப்பேரவை தேர்தலுக்கான எதிர்க்கட்சியான மகா கூட்டணி தனது 25 அம்சங்களைக் கொண்ட தேர்தல் அறிக்கையை இன்று வெளியிட்டது.
தேர்தல் அறிக்கையை மகா கூட்டணியின் முதல்வர் வேட்பாளர் தேஜஸ்வி யாதவ், காங்கிரஸ் கட்சியின் தேசிய தலைமைச் செயலாளர் பவன் கேரா, விஐபி கட்சி தலைவர் மற்றும் துணை முதல்வர் வேட்பாளர் முகேஷ் சஹானி, சிபிஐ (எம்எல்) பொதுச் செயலாளர் தீபங்கர் பட்டாச்சார்யா உள்ளிட்டோர் இணைந்து வெளியிட்டனர்.
அறிக்கையில், பழைய ஓய்வூதியத் திட்டம் மீண்டும் நடைமுறைக்கு வரும் என்றும், ஐடி பூங்கா, சிறப்பு பொருளாதார மண்டலம், பால் மற்றும் விவசாய சார்ந்த தொழில் வளர்ச்சி குறித்த பல்வேறு வாக்குறுதிகளும் இடம்பெற்றுள்ளன.
முக்கிய வாக்குறுதிகள்:
🔹 அரசு வேலைவாய்ப்பு சட்டம்: ஆட்சிக்கு வந்த 20 நாட்களுக்குள் ஒவ்வொரு குடும்பத்திலும் ஒருவருக்கு அரசு வேலை கிடைக்க சட்டம் கொண்டு வரப்படும். 20 மாதங்களில் வேலைவாய்ப்பு செயல்முறை தொடங்கப்படும்.
🔹 பழைய ஓய்வூதியத் திட்டம் (Old Pension Scheme): அரசு ஊழியர்களுக்காக மீண்டும் அமல்படுத்தப்படும்.
🔹 பெண்களுக்கான நிதியுதவி: டிசம்பர் 1 முதல், மாநிலம் முழுவதும் பெண்களுக்கு மாதம் ₹2,500 வழங்கப்படும்.
🔹 இலவச மின்சாரம்: ஒவ்வொரு குடும்பத்துக்கும் மாதம் 200 யூனிட் இலவச மின்சாரம் வழங்கப்படும்.
🔹 மது தடையை நீக்கம்: மகா கூட்டணி ஆட்சிக்கு வந்தால், தற்போதைய மதுவிலக்கு சட்டம் நீக்கப்படும்.
🔹 சுய உதவி குழு பெண்களுக்கு நலத்திட்டங்கள்: ‘ஜீவிகா தீதி’ எனப்படும் மகளிர் சுய உதவி குழு உறுப்பினர்கள் நிரந்தர ஊழியர்களாக மாற்றப்படுவார்கள்; மாதம் ₹30,000 ஊதியம் வழங்கப்படும். அவர்களின் கடன்களுக்கு வட்டி தள்ளுபடி செய்யப்படும்; 2 ஆண்டுகள் வட்டி வசூலிக்கப்படாது.
🔹 ஒப்பந்த ஊழியர்கள் நிரந்தரம்: அனைத்து ஒப்பந்தம் மற்றும் அவுட்சோர்ஸ் ஊழியர்களும் நிரந்தரப்படுத்தப்படுவார்கள்.
தேர்தல் அட்டவணை
பிஹார் சட்டப்பேரவையின் தற்போதைய பதவிக்காலம் நவம்பர் 22 அன்று முடிவடைகிறது.
புதிய சட்டப்பேரவைத் தேர்தல் இரண்டு கட்டங்களாக — நவம்பர் 6 மற்றும் 11 ஆம் தேதிகளில் நடைபெறும். வாக்கு எண்ணிக்கை நவம்பர் 16 அன்று நடைபெறும்.
இந்தத் தேர்தலில் மூன்று முக்கிய அணிகள் மோதுகின்றன:
- தேசிய ஜனநாயக கூட்டணி (NDA) — ஜேடியூ, பாஜக தலைமையில்
- மகா கூட்டணி (RJD, காங்கிரஸ் உள்ளிட்ட கட்சிகள்)
- பிரசாந்த் கிஷோர் தலைமையிலான ஜன் சுராஜ் கட்சி
தேர்தல் வேட்பு மனுத் தாக்கல் முடிந்த நிலையில், அனைத்து கட்சிகளும் தீவிர பிரச்சாரத்தில் ஈடுபட்டு வருகின்றன.
